«استمداد حضرت ابوالفضل (ع) از حضرت سيدالشهدا (ع)»
استاد محمد عابد

تعجيل ايله گلماقدا اماندور آتام اوغلی
سندن اورگيم چوخ نگراندور آتام اوغلی
عفو ايله بو دعوتده اگر اولدی جسارت
اولسون قسم اوز جانوه خواهشدی نه دعوت
احسان ايله بو خواهشمی ايله اجابت
گل باشوه عباسی دولاندور آتام اوغلی
تا گوز آچيب احساس ایلديم گوز نَدی قارداش
خورشيد له مه يا گيجه گوندوز نَدی قارداش
نطقه گلهلی درك ايدهلی سوز ندی قارداش
عبّاسه آدون ورد زباندور آتام اوغلی
يوخدور نظر الفاظده سنسن هامی منظور
سن دلده بيان گوزده ضيا باشدا اولان شور
گوز چهرهوی ترك ايتمدی، گوردون شب عاشور
هرگز ديمدی باغ جناندور آتام اوغلی
عادتله يانان قلبيم ايدوب اسموی تكرار
خشگيده زبان ايتدی اورك دردينی اظهار
عشقون كه منی ايلدی بو خواهشه وادار
ذرّات وجوديمده نهاندور آتام اوغلی
عشقوندی فقط قلبده يوخ اوزگه تعلّق
بو خُلقله نفسيم تاپيب اوّلده تخلّق
گل گلماقوا ايتگيله عباسی تصدّق
هر بير قدمون ارزشی جاندور آتام اوغلی
جان فديه يار اولماسا خدمت ديماق اولماز
باش بذل نگار اولماسا عزّت ديماق اولماز
سودای محبّتدی مصيبت ديماق اولماز
هر غم منه تهذيب رواندور آتام اوغلی
بير حرف زبانيمده منيم يوخدی گلايه
خشگيده لبيم خنده ويرار موج بلايه
امواج بلادور يتورن اوج ولايه
بو امر، مسلّم نه گماندور آتام اوغلی
من لازميدی فديه جانان اولام اولدوم
لب تشنه ره يارده قربان اولام اولدوم
سو اوسته سوسوز قانيمه غلطان اولام
اولدوم سندن ولی دل چوخ نگراندور آتام اوغلی
مينلر من اولام بير نفسون قيمتی اولماز
گل اولماسا هرگز چمنين نزهتی اولماز
سنسيز بو جهان اولسادا خاصیّتی اولماز
بالّهی جهان سنله جهاندور آتام اوغلی
سينم سپر ايستردی اولا تير بلايه
تا يتميه گنجينه اسرار خدايه
افسوس دوشوب توپراقا ايندی بو وقايه
هر چند گنه تيره نشاندور آتام اوغلی
درديم بودی، سن بیمدد و ياور و تنها
بو دشت كمينگاه و كماندار سراپا
ايوای، نشان بير، يارالی تشنه لب، امّا
دنيا دولوسی تير و كماندور آتام اوغلی
آخر نفس احساس ايلورم عمره علاقه
ايستور منی توش ايتسون اجل درد فراقه
بير لحظه بولورسن دوشه گر سندن اوزاقه
عباسين او دم حالی ياماندور آتام اوغلی
گل يارهلر ايلوب بولورم بو چولی گلشن
امّا ندی بو منظر گلگون گورورم من
آيا هامی دنيانی دوتوب سوری و سوسن
يا آينه چشمده قاندور آتام اوغلی
يازدی خط خونين، ورق جسمده شمشير
گلواژه عشق اولدی گوزل طرزيله تعبير
دنيا بويی گويادی بو تعبير و بو تحرير
اهل دله تبيان و بياندور آتام اوغلی
ديداروله دل يتر آخر بلی كامه
توفيق تاپار جان بولورم اخذ مرامه
عطرون گتورور باد صبا پيكی مشامه
انفاسی اودور مشگ فشاندور آتام اوغلی
مأنوس اولالی عشقه ازل، خامه تقدير
دل صفحه سنه عكس رخون ايلدی تصوير
عشقون منه جان مونسی دور منده نه تقصير
سنسيز گر ايشيم داد و فغاندور آتام اوغلی
قان سيل كيمی موج ويريب داغ داشا قارداش
بير ورطهدی بو غم چولی باشدان باشا قارداش
قان قويموری قارداش يتيشه قارداشا قارداش
غرقاب، كران تا به كراندور آتام اوغلی
بو طايفه دنيايه آزيب دينينی ساتدی
باشدان هوس باطله حق فكرينی آتدی
هر چند كه ظاهرده اوز آمالنه چاتدی
هر سود، بو سو داده زياندور آتام اوغلی
نفسيم اولالی نعمت تكوينيله مأنوس
اولدوم سنه خادم سنه چاكر سنه پابوس
آخر نفسی ايلمه مشتاقوی مأيوس
لطفه بولوسن ياخشی زماندور آتام اوغلی
دل روشن اولوب آتش جان، سوز جگردن
چوخ فيضه يتوب ناله شب آه سحردن
دوشموب بولورم ناله، دعا، آه، اثردن
ديدارون او تأثيره نشاندور آتام اوغلی
ای بارقه رحمت بی منّت داور
ای جود مجسّم كرم و فيض مصوّر
تنها نه منم لطفوه محتاج برادر
محتاج سنه كون و مكاندور آتام اوغلی
قان آيت نصرتدی بو قانلی علمونده
دل هديه ناچيز دی تشريف غمونده
باش نقدهِ نثار اولماسا خاك قدمونده
جان دوشنه بير بار گراندور آتام اوغلی
«عابد» سنه دم ويرديله «ذهنی» و «سخاوی»
چون ذكر مصيبتده او شاعر دی بو راوی
تكرار ايله اوّل سوز اولوب چوخ سوزه حاوی
تعجيل ايله گلماقدا اماندور آتام اوغلی