✔️صاحب عصرفراقینون مبتلالری _ کامران تبریزی

وجودون ای گوزل گنجینه حسن و وجاهتدی
کناروندا سنون یوسف فقیر و بی بضاعت دی
**********
کساد ائتماقه حسن یوسفین رونقلی بازارین
سنون بیر بئیله حسنوندن فقط بیرگل کفایتدی

نگاهون گر یئری قالسا جمالوندا یئری واردی
گل رخسارون از بسکه ظریف و با لطـا فتدی
**********
گوروبدور نرگسین اوغلوندا نرگس گوزلرین نرگس
بینمز ئوز گوزون گـــرچه گُوزی ورد جماعتدی

امامت تک گوزل لیق حجتِ الله ختم اولموش
سنون گویچکلیقون اون بیر گوزلیقدان علامتدی
**********
سن او بیر گویچکین گویچلیقندان بهره مند اولدون
بونی عالم بولر اثباتینه حجت نه حاجتدی
ائله دیلچسبدور که قویموری لب لبدن آیرلسون
سوز آچماق شهد وصلوندن عجب مشکل حکایتدی
***********
کمندوندن دوشر تا سوز، اسیرون تئز دییر به به
اسیر عشقون اولماق بسکه شیرین بیر اسارتدی

هره بیر عشقیلن مشهور اولوب مولا بو دنیاده
سنون عشقونده ، مشهوریتِ اهـل ولایت دی
***********
بو گونکی وصلوون وار مهدیا هجران کمندینده
بهار وصلووی تهدید ائــــدن پائیز فرقتدی
سنون عشاقوون جشن و سروری تک بو گونلوقدی
صباح عشاقوون حالتلری بیر ئوزگه حالتدی
***********
دمادم آه چکماق قان اوتوب قان آغلاماق سن سیز
یولووی گوزلین عاشق لره چوخدانکی عادتدی

گرک شک ائیلیاق انصافینه انصافآ ای مهدی
دیسه کیم شور هجرانون قیامتدن علامتدی
*************
سنون هجرونده که برپا اولان غوغا قیامتدن
علامت یوخ ئوزی چون ئوز یرینده بیر قیامتدی

سوروشما مبتلایان فراقون کسب و کاریندن
که سن سیز ایشلری دنیاده تنها کسب محنتدی
***********
ئوزون گل اللریندن دوت ایاقدان قویما دوشسونلر
که الدن توتماق آل اللّهه بیر دیرینه خصلتدی

نگاری گورمیوب ئولماق یامان ئولماخدی داد اوندان
بله ئولماق شکنجئیلن برابر بیر مشقتدی
**********
بولر تنها جمال یارینه حسرت قالان عاشق
که جانانانین یوزون بیریول گوروب ئولماق نه نعمتدی

ظهورون بیر عنایتدی بونا سوز یوخ ولی مهدی
اونون تعجیلی عشاقه عنایت در عنــــایتدی