ازلدن رسمدور گلشنده بیر گل پایدار اولماز
گلون سولماقینه بلبلده هیچ صبر و قرار اولماز
توکر گوز یاشینی بلکه اورکدن دردی اسگیلسین
او حاله گوز یاشیندان غیره بیر درمان اولار اولماز
گوررسن اگلشیبدی شاخه اوسته بوینی چیگنینده
نه قدری گیزلدور اوز دردین اما هی باخار اولماز
چتیندور بیر اولوم بیرآیریلیق دنیاده هر غمدن
آلار دیلدن قرار و صبری الده اختیار اولماز
سولوب بیر گلده یثربده نه گل زیوردی جنّاته
گلستان اولسا عالم او گلون مثلی دوبار اولماز
آدی زهرا اوزی مرضیه همراز ولیّ الله
اونون تعریفینه هیچ بیر قلمده اقتدار اولماز
قویوب اوغلانلارین قزلارین آغلار گیتدی دنیادن
فراق یاریدن، یارین نیجه اشکی نثار اولماز
گونوز گوز یومدی دنیادن قالوب نصف شبه غسلی
گیدور زهرا، علی بو غمده آیا اشکبار اولماز؟
آلوبدور اللری اوسته نگارین مغسله قویدی
علینون بیرده عمرینده بیله بیر لیل تار اولماز
توکور رخساره نم نم گوزیاشی هردن دیور زهرا
بولورسن عم قیزی سنسیز منه خوش روزگار اولماز
بو شهر ایچره منیم سنده سورا بیر همدمیم یوخدی
بو ایوده بوش یرین گورسم نیجه دردیم هزار اولماز
منی پوزقون گورنده دیندیرردون دردیم اسکیلسون
دییردین غم یمه ظلمون بناسی پایدار اولماز
گیچن گون باشون اوسته آغلادیم گوز یاشیمی سیلدون
دیدین سن آغلاما، سن آغلاسان منده قرار اولماز
دور ایندی گور نیجه قلبیم دولوبدی غصه دن زهرا
فراقینده یانور سینم شراری آشکار اولماز
قالوبدور چاره سیز مظلوم عم اوغلون غم حصارینده
بو درده دوشموین بولمز، بیله غملی حصار اولماز
ایویم دوشدی صفادن نیلیوم قالدی قاپوم باغلی
گیچن خوش گونلریم گلمز اله بیرده کرار اولماز
وصیت ایلدون غسلون ویرم من کوینک اوستوندن
چکوبسن یاروه پرده بیله خوش استتار اولماز
سنه سیلی دَیَن گوندن یوزون گیزلتموسن مندن
گورردیم گل یوزوندن معجرین بیردم کنار اولماز
منیم گوزیاشیمی سیلدون آپاردون یاروه یاخدون
بولوردن یاروه بیر اوزگه مرحم سازگار اولماز
الیمده اولمادی چارم سالیدیم یاروه مرحم
سنون تک بو جهاندا چاره سیز بیر زخمدار اولماز
منیم گوزیاشیمی گوردوقجا گوزیاشین توکور زینب
دومان دوتموش داغ اوسته هیچ بیله ابر بهار اولماز
حسینون اللری قوینوندا قالموش بوینی چیگنینده
ایله پوزقوندی رخساری بیله پوزقون عذار اولماز
حسن کلثومیله باهم دیور لایلای ننم لایلای
آناسیز بیر اوشاقین قلبی آیا غصه دار اولماز
قوتاردین درد الیندن ای علینون یاری خوش گلدون
سولان ای ظلم الیله گلشن و گلزاری خوش گلدون
بو غمده وار یری دائم گوزوم یاشی روان اولسون
سارالسون غصه دن رنگیم ایشیم آه و فغان اولسون
اوزون گیتدون منی قویدون کمکسیز غم دیارینده
بو سولقون گللره سنده صورا کیم باغبان اولسون
اوشاقلار اولماسا آخشام چراغ یاندیرمارام ایوده
چراغی نیلورم سنسیز ایو اولسون یا جنان اولسون
بولورسن عمقیزی روحیم قوشی ایودن کوسوب سنسیز
باخاندا بوش یرین گورسم نیجه دیلده توان اولسون
گیجیله دفن ایدوم گنجینه طاهانی یثربده
گرک قدرین کیمی قبرینده گوزلردن نهان اولسون
بابان پیغمبره زهرا گلایه ایتمه سن مندن
یارالی سینه وی گورستمه قویما قلبی قان اولسون
قلم قان آغلوری یازما نصیری فاطمه دفنون
او غملی ساعته زینب گرکدور نوحه خوان اولسون

شعر دیگر از این شاعر اهل بیت عصمت و طهارت (ع)

یتیشیب فصل خزان بلبل ایدور آه و نوا
غم یاغوب یثربه گویا دوتولوب رنگ هوا

باغبان گلشن و گلزاری ایله گوزدن آتوب
تانیمور هیچ دیه سن الفتی یوخدور ابدا

بیر دویونجا او گوزل گوللرینی ایلمیوب
باغلیوب بار سفر جهد الییوب آیریلیقا

ای مسافر بو گلستانی کیمه تاپشیریسان
باغبانسیز گله قالماز نه طراوت نه صفا

گُل سولار غنچه یانار یاسمن افسرده اولار
بوینی چیگنینده بنفشه گیینر رخت عزا

بنذییر منظره سی فاطمه نون منزلینه
او زمانیکه اوین ترک ایلیور خیرالنسا

دورد اوشاق بیر آغا آغلوللا جوان بیر خانما
آدی زهرا اوزی مظلومه ایوی دارالشفا

بیری سسلور منی قویدی ننه سیز گیدَی ننم
بیری سسلور نیه زهرا منه سس ویرمور آتا

بیری امَا الی قوینوندا توکیر گوز یاشینی
سسلوری آچ گوزووی بس نیه دینمورسن آنا

یاره لر یورقونی غم خسته سی مظلومه ننه
سینوون یارسینه زینبیوون جانی فدا

قیزلارین دردی اولاندا آناسی گویلون آلار
دور منیم گویلومی آل قویما سالام باشه قرا

آغاران زلفووی گوردوم توکولوب گل یوزووه
دیدیم ایوای منه اولدی گونوزوم لیل دجی

نه گلن وار نه بولن وار گیجه گیچموش یاریدان
وقت او وقت ولدی خانم فاطمیه غسل اولونا

مغس اوسته قویولوب گُـل بدنی فاطمه نون
دوقَوز ایلَوق گَـلینه غسل ویرور شیر خدا

۰

۰

۰

این شعر در ادامه ابیات زیادی دارد

***********************************

حضرت فاطمه زهرا (س)